Для Интернет-страницы "Созвучие" Р. Миннуллин прислал свое новое стихотворение на родном языке. Произведение посвящено белорусскому просветителю и первопечатнику Франциске Скорине. 

Безнең чорга синнән ниләр калган?..

                                  Франциск Скоринага

Милләттәшләреңә мирас булып

Калган синең бөек хезмәтләрең.

Шуңа күрә ничә гасырдан соң

Күрсәтәләр сиңа хөрмәтләрен...

Безнең чорга синнән ниләр калган? –

Халык тарихында Эзең калган!

Яңа гасырларга килеп җиткән

Бөек Эзең - Бөек Сүзең калган!

Безнең чорга синнән ниләр калган? –

Үз халкыңа әйткән Хитап калган!

Хитабыңны ташка бастыргансың...

Син бастырган Бөек Китап калган!

Безнең чорга синнән ниләр калган? –

Туган җиргә Бөек Сөю калган!

Үз халкыңа Бөек Мәхәббәт һәм

Халкың өчен Яну-Көю калган!

Тарих туфрагына күмелмичә

Скорина дигән Атың калган!

Иң мөһиме – синең исемеңне

Яд итәргә Бөек Халкың калган!

Безнең чорга синнән ниләр калган? -

Бер могҗиза калган кадәресе...

Шуңа күрә дә бит гасырларның,

Милләтеңнең син бер Кадерлесе!

                                   Роберт Миңнуллин,

                 Татарстанның халык шагыйре